حل لكابوس كورونا من داخل الكتاب المقدس ..اتكل ولا تتواكل
صوره ارشيفيه




طوبى لمن اله يعقوب معينه واتكاله على الرب الهه ( مز ١٤٦ : ٥)





 الايه دي بتوضح لنا المعنى الحقيقي للاتكال على ربنا فيه فرق كبير بين الاتكال على الله والتواكل الاتكال على ربنا حسب معنى الايه دي هو اني ابذل كل جهدي وربنا يشاركني ويعينني طوبي لمن اله يعقوب معينه معنى معينه انه بيبذل جهد بيقوم بعمل والله يعينه ويساعده قداسة البابا شنوده قال ان الاتكال على ربنا هو حاله من الاطمئنان بسبب تسليم الأمور ليد الرب مع الاستناد الكامل عليه ( يتكل عليك العارفون اسمك لأنك لم تترك طالبيك يارب) ( مز ٩ : ١٠) لكن التواكل بقى حاجه تاني خالص سيدنا انبا رافائيل قال ان التواكل هو الكسل والتراخي بادعاء ان الله مسؤل عن حياتي التواكل اللي اغلبنا عايش فيه دلوقتي ومصدق انه اتكال علي ربنا هو اني ما اعملش اي حاجه واقول اللي عاوزه ربنا يكون يعني يقولولك البس الكمامه وماتخرجش من البيت الا للضرورة وخلي فيه تباعد بينك وبين غيرك يقول يا عم سيبها على الله اللي عاوزه ربنا يكون لا ده مش اتكال على ربنا ده تواكل ده مش ايمان ابدا اصلا ايمان بدون أعمال ميت فين أعمالك اللي بتدل على إيمانك معنى الاتكال من وجهة نظرك هو اني ما اعملش حاجه وربنا هو اللي يحمي من غير اي مجهود مني طيب لما بتتعب بتروح ليه للدكتور ما ربنا قادر يشفيك لوحده انت مش متكل عليه وليه بتشتغل ما ربنا هيوكلك ويشربك وانت في بيتك مرتاح انت مش متكل عليه وليه الطالب يذاكر ما ربنا هينجحه من غير ما يتعب ويذاكر ما هو متكل عليه اللي بيحصل ده اسمه تواكل مش اتكال ربنا خلقنا لينا دور لازم نقوم بيه لينا رسالة لازم نؤديها مش نقف مكتفين ايدينا ونقول ربنا هو اللي يعمل الاتكال معناه اني اعمل كل اللي اقدر عليه وربنا يساعدني ويحميني وساعتها لو حصلت حاجه هتبقى فعلا مشيئة ربنا مش مشيئتك بعدين عدم اهتمامك بالإجراءات الوقائية معناه انك مستهتر ولا مبالي ومغيب العقل وماتعرفش حاجه عن ربنا لما استهتارك يكون سبب في أذى أقرب الناس ليك وتشوفه بيتعذب قدامك من الآلم ومفيش مكان يتعالج فيه ومفيش اصلا علاج ساعتها هيبقى ليك عين تطلب من ربنا يشفيه إذاي ما انت السبب في الوقت ده مش هينفع الندم وكلمة ياريت مش هيبقى ليها معنى بعد فوات الأوان اصحوا المستهتر مش بيؤذي نفسه بس بيؤذي أقرب الناس ليه معاه انت مش عايش لوحدك لو مش خايف على نفسك خاف على اللي حواليك خليك إيجابي واعمل اللي عليك واللي عاوزه ربنا يكون حياتك وزنه ربنا هيحاسبك عليها صحتك وزنه ربنا هيحاسبك عليها ياترى هتكون تاجرت وربحت ولا دفنتها اقعد في البيت وما تطلعش الا للضرورة وربنا ما بينساش حد محدش بينام من غير عشا ربنا قادر يسد كل احتياجاتنا اطلع من الازمة دي انت وكل حبايبك معاك وتكونوا عايشين على فتات الطعام احسن ما تطلع منها وانت تكون السبب في فقدان اغلى ما ليك احنا في خطر حقيقي بس احنا برضو اللي في ايدنا نساعد نفسنا وننقذ نفسنا ونحمي نفسنا طبعا بمعونة ربنا بس نرحم بعض عشان ربنا يرحمنا

مواضيع من نفس القسم

+ كلنا هنموت ده اكيد كل واحد ليه ساعه ربنا محددهاله من قبل ما يتولد اصلا بس على الاقل ما اكونش سبب في فقدان اغلى الناس عليا لو حصل كده بسبب استهتارك صدقني هتكون مشاعر الندم أقوى وأمر مليون مره من مشاعر الحزن والآلام
+ في النهاية هقولكم  ( ان الله لا يساعد أولئك الذين لا يساعدون أنفسهم ) ( فان الذي يزرعه الإنسان اياه يحصد أيضاً) ( غل ٦ : ٧)