الاجابه الصحيحة علي سؤال هل المريض النفسي قليل الإيمان؟؟
صوره ارشيفيه




هل المريض النفسي قليل الإيمان؟؟ د.مجدي إسحق





سؤال بيوجع ، و إجابته لو ما عرفتش تقولها صح بتوجع اكتر

المرض النفسي زي اي مرض عضوي
ده حتي فيه إتجاه طبي لتغيير المسمي إلي "الامراض العضو نفسية" أو "النفس عضوية" ، حيث ثبت أن هناك تغيير في فسيولوجيا خلايا المخ الأمر اللي تم اثباته بأشعة ال PET المتطورة

مش بس كده ، ده ثبت في احدث الأبحاث أن هناك خلل في كيمياء المخ زي السيروتونين و الدوبامين ، و كذلك اضطراب حاد في عشرات المستقبلات التي تعمل عليها هذه المواد

يبقي مريض الاكتئاب أو الوسواس أو القلق أو الهلع أو الخوف أو الفصام أو الاضطراب الوجداني مش مذنب أو مدان أو متهم بأنه "مش تايب" و لا "بعيد عن ربنا" و لا "ما بيصليش و لا "ايمانه ضعيف"

كتير من الناس دمرتهم الكلمات دي ، و كسرت نفسياتهم و جابتهم الارض و البعض منهم بسبب شعورهم بالذنب من الكلام ده ما راحوش يتعالجوا و قعدوا متعذبين سنين و سنين أو راحوا للدكاترة و بطلوا علاجهم بعد ما سمعوا اللوم ده و تدهورت حالتهم لدرجة مخيفة

للدرجة دي مش حاسين بالمريض ؟؟ للدرجة دي مش حاطين نفسكم مكانه ؟؟ ما حدش داق عذاب المرض النفسي كل اللي بيعمله الناي يقعدوا يدوا في مواعظ و نصايح تخلي نفسية المريض مجروحة اكتر ما هي مجروحة

الناس دي ذنبها في رقبة اللي عمال يوجع ضمايرهم من غير فهم و لا وعي و لا حكمة

طبعا نشجعهم علي الصلاة و العبادة بس من غير ما نربط المرض بحالتهم الروحية

رفقا بالناس يا اصحاب القلوب الرحيمة
قولوا لهم "حاسين بيكم" ، او "ربنا يبارك لكم في العلاج و يتمم لكم الشفاء" ، أو "خير ما عملتم انكم استشرتم الطبيب و ربنا يجعل في ايده الشفا"

الكلام أحيانا بيبقي دوا اكتر من الدوا ، و أحيانا بيبقي عيا اكتر من العيا نفسه